EG SKAL TIL ASIA

Kjære folk!

Eg burde kanskje heller ha brukt «Hjelp, eg skal til Asia!» som overskrift. Dette er nemleg den delen av verda eg kjenner aller dårlegast til når det gjeld både geografi og kultur.

Dette veit eg:

• Asia inneheld eit så stort mangfald at det er vanskeleg å beskrive.
• Det er fleire menneske busett i Asia enn i nokon annan verdsdel.
• I Asia kan turistar møte alt frå ørken, shoppingsenter, vill jungel og vakre tempel.
• Kulturen og språket er svært annleis enn det me europearane er vane med.
• Menneska er kjende for å setje si ære i å vere hjelpsame

Me skal fyrst klare oss sjølv i Singaporenokre dagar. Singapore er både øy, by og sjølvstendig stat. Eg har lest at byen er rein, oversiktleg og ein av dei aller dyraste byane i Asia. Det er visstnok også svært trygt å ferdast i denne byen. Det er kanskje ikkje så merkeleg sidan straffene som rammar kriminelle er svært strenge. Det kostar deg dyrt dersom du kastar ifrå seg søppel, spyttar på offentleg stad eller går på raudt lys.

Etter fire dagar i Singapore, skal me vidare innom
– Bangkok, hovudstaden i Thailand, der det er så mykje trafikk at det løner seg å gå i staden for å ta drosje, og der skyskraparane er høge og templa vakre.
–Kambodsja, som eg forbind mest med amerikansk teppebombing, Raude Khmers grusomheiter og eit folk som har vore gjennom store lidingar.
–Vietnam, som på trass av den totalt øydeleggjande krigen på 60- og 70-talet, no er ein av Asias raskast veksande økonomiar.

I alle desse tre landa har me bestelt guida turar, og eg er glad for det.

Ferien vår endar opp i Hong Kong, der me igjen skal klare oss utan kjentfolk i nokre dagar. Der har eg forventningar om at dei fleste kan engelsk og at sjølv om byen er full av folk, er kaoset nokolunde velorganisert.

Eg kan ikkje seie anna enn at dette vert spanande.

Eg veit ikkje kva slags mogelegheiter for blogging eg vil kome til å møte på denne turen, men eg skal prøve. Å leggje ut bilete på Instagram pleier i alle fall å gå bra.

Helsing frå K-M

Forfatter: Kjærefolk

Litt om meg: - Har avslutta ei mangslungen karriere innanfor norsk skulevesen. - Har eit meir enn 100 år gammalt hus i Ål i Hallingdal, og synes at det er stas. - Gift, mamma, farmor og bonus- både det eine og det andre. - Stort sett blid, glad og nøgd med livet. Kvifor byrjar ei litt gammel dame med blogging? Eg bloggar fyrst og framst fordi eg er glad i å skrive. Det kan jo også hende at det finnes einkvan som har interesse av å bli invitert inn i kvardagen og tankane til eit heilt vanleg kvinnfolk. Vis alle innlegg av Kjærefolk